بنك القاهرة عمان

غضب واسع على مواقع التواصل الاجتماعي ببسب فصل ممرضة من احدى المستشفيات لإرتدائها “جلباب”

28 سبتمبر 2022
غضب واسع على مواقع التواصل الاجتماعي ببسب فصل ممرضة من احدى المستشفيات لإرتدائها “جلباب”


وطنا اليوم_محمد ملكاوي_ نشرت الممرضة القانونية اسماء ابو جامع عبر حسابها على توتير والتي تعمل لدى اكبر المستشفيات في الاردن انها تقدمت باستقالتها بسبب لباسها “الجلباب “.

وقالت الجامع في منشورها انها تخرجت من الجامعة الاردنية منذ سنة تقريبا بكالوريس تقدير جيد جدا وبعد حوالي شهرين من عملها بهذا المستشفى تغيرت مديرة التمريض والتي بدورها قامت بمنع اللباس الطويل للممرضات.


واضافت انها رفضت تغيير لباسها او تقصيره فنشبت مشادات كلامية بينها وبين مديرتها ادى بها الى ترك عملها وعدم ترك مبادئها او تغيير لباسها الشرعي.

وتاليا نص المنشور الذي رصدته وطنا اليوم عبر وسائل التواصل الاجتماعي :



رسالة من ممرضة قانوية فصلت بسبب لباسها الشرعي
…..

” أنا اليوم قدمت استقالتي من أفضل مستشفيات الاردن الي صلي فيه شهرين والسبب الجلباب (سكرابي الطويل) ?

انا الممرضة القانونية أسماء ابو جامع الحافظة لكتاب الله متخرجه من سنة من الجامعة الاردنية بكالوريوس تمريض بتقدير جيد جدا وحاصلة على دبلوم بالcupping therapy و شهادة BLS وكتير شهادات علمية وصحية وتطوعية..

بعد شهرين دوام بالمستشفى تغيرت مديرة التمريض واول م اجت اقرت بأنه الجلباب ممنوع واللبس الشرعي يصير للركبة.

طبعا خبرني المسؤول عن الموضوع ورفضت رفض قطعي وبعد كم يوم اجت المديرة الجديده وشافتني وقالت للمسؤول هاي الي ما رضت تطبق !!
واجت قعدت تحكي معي وتقلي احنا مش اعداء الدين بس شو فرقت معك هالكم سم وانت البنت الوحيدة بالمستشفى الي اعترضت وما طبقت من المجلببات؟! وقعدت تسألني هو انت لهاي الدرجة ملتزمة؟
وانا رديت عليها بنفس السؤال انتو شو فرق معكم اني اقصر هالكم سم ؟!! وقلتلها لا مش ملتزمة بس الحمدلله حافظة للقرآن♡.

انا لبسي طبي ومراعي لقوانين ضبط العدوى وما فيه اي اشكال
لا بأذي حد بلبسي ولا بنأذي منه !

طبعا انا مش عارفة مين مفهم البشر انا بنعرفش نتحرك بالجلباب ترا مستعدين نتسلق جبال ونعمل كلشي بكل راحة بلبسنا ?محدش عليه منا ، اذا تعرقلنا محدش يساعدنا?..

وسالتها شو الغرض من التقصير والجواب كان “مشان نوحد الشكل ! يعني الشرعي للركبة ”

المهم المديرة ما عجبها ردي وقالت معك لآخر الشهر فكري
والمسؤول قلي فكري مش حابين نخسرك انت من اشطر البنات وأأدبهم..

تاني يوم رديت خبر للمسؤول انا معنديش استعداد اقصر سم واحد وبدي اقابل مدير المستشفى اتكلم معه وضلو اسبوع ياجلو فيني واخر اشي كلمت المسؤول قلي مفش مجال وهاد اخر قرار انت فكري و كرر احنا مش حابين نخسرك انت من اشطر البنات واادبهم…

طبعا انا بالمقابلة اول اشي حكيته للمسؤولة وقتها عن لباسي انه طويل وكان ما في اي مشكلة .
واول مرة بشوف مؤسسة بتغير قوانينها بتغير شخوصها ..


المهم ، انا تركت الشغل والحمدلله (المبادئ لا تتجزأ والثوابت لا تتغير والقيم لا تباع ولا تشترى والعوض والرزق مكتوب ومعلوم عند رب العالمين)

اخواتي البنات ارجوكم لا تتنازلوا عن حقوقكم مشان اي اشي والله ربنا عظيم وبعوض ،
بكل أمانة انا بالبداية من شدة مهاجمتهم لمبدئي حسيت اني انا الخطأ واني متخلفة ومعقدة ونفسية? بس الحمدلله على تثبيت الله ..

انا مش مبسوطه اني تركت الشغل لأني كنت بحاجة لخبرة عملية مشان الدراسات العليا والكادر بالمستشفى كان لطيف ومتعاون وكنت حابة البنات كتير والراتب أعلى اشي للخريجين الجدد تقريبا بس اكيد ربنا اختار الأفضل وربنا رب الخير والجبر
وأهم ما في الأمر الأثر الطيب والمبدأ الي حاربت مشانه الي اليوم شعرت فيه بعد م خبرت الجميع عن الاستقاله واسمعت منهم كلام كتير بريح

ما رح اسامح اي حد استهزأ بلباس الجلباب وقلل من قيمته بقلوبنا والتعب النفسي الي حطوني فيه وما في اشي بعوضني ، وعند رب العالمين لقائنا لانه هاد زي الصلاة فرض علينا مش تجميلي ولا سنة اضافية . واكيد كل محاربتي مشان المبدأ وحاولت اوصل رسالتي لكل حد

*ملاحظة ما حد يقلي روحي عالمستشفى الفلاني او الفلاني بس بسمح بالجلباب لانه الجلباب فرض ع كل مسلمة ومفروض يكون مسموح بكل مكان اذا امريكا الي بتعطيهم الاعتمادية بسمحو فيها للنيرس تكون لابسة جلباب او تنورة هي حرة ?

كنت رح ارفع قضية عليهم عند وزارة العمل بعدين تذكرت اني بالأردن وأقل الإيمان اني اوصل رسالتي لكل الناس واطالب بحريتي الكاملة بلباسي في بلد الإسلام..

ختاما اللهم هجرةاللهم ثباتا ، صبرا ورضا

اللهم اجعلنا من اهل الأثر الطيب الممتد وارضى عنا وارضينا يا رحيم♡

ولباس التقوى ذالك خير