*العميد المتقاعد زهدي جانبك
الهوية الوطنية الاردنية.
والهوية الجامعة.
وهوية الأحوال المدنية.
أسرعت الزائرة الى المدخل لتبدأ زيارتها التاريخية الى المدينة الوردية، اوقفها الموظف المختص مع رجل الشرطة السياحية وطلب مشاهدة تذكرة الدخول.
الزائرة: وهل يوجد تذاكر للدخول؟
الموظف : نعم.
الزائرة: اعطيني تذكرة واحدة لطفا.
الموظف: هويتك؟
الزائرة: هويتي هي الهوية الوطنية الاردنية.
الموظف: (مبتسما) اعطيني هويتك الوطنية الاردنية يا ستي .
الزائرة: يا أخي هاي ثقافتي حضارتي عاداتي تقاليدي، كيف اعطيك اياها؟
الموظف: يا ستي اذا سمحتي إثبات هويتك الوطنية الاردنية، لطفا.
الزائرة: ليش بتضحك، شكلك من جماعة الهوية الجامعة والأفلام…
الموظف: مبتسماً، يا ستي هويتك الوطنية الأردنية، هويتك الأردنية الجامعة، اذا سمحتي اثبات انك اردنية أو اجنبية، خليني امشي الناس وراكي.
الزائرة: بنفع هوية الأحوال المدنية؟
الموظف: دخيل عرضك، نعم هذي هي المطلوبة، هاتي هالهوية خليني اقطعلك التذاكر.
الزائرة: يعني المطلوب هوية الأحوال المدنية؟ طيب احكي هيك من الاول.
الموظف: يا ستي من الاول حكينالك بدنا إثبات انك اردنية… دخلتيلنا بفلسفة هوية وطنية وهوية جامعة ومش عارف ايش… كل المطلوب ان تثبتي انك اردنية حتى تدخلي البتراء.
الزائرة: ليش هو اللي مش أردني ما بدخل؟
الموظف: لا يا ستي، بدخل، لكن كل شيء وله تسعيرته.
الزائرة: كيف يعني؟
الموظف: اول اعطيني إثبات انك اردنية، حتى اقطعلك التذكرة حتى نمشي الدور، وبعدين بنحكي.
الزائرة: تفضل، هاي هوية الأحوال المدنية، هسه صدقت اني اردنية؟
الموظف: نعم يا ستي، الان صدقت، شكرا لكِ، نعم هذا هو الإثبات الوحيد انك اردنية أو جواز السفر اذا معك… غيرهم غير مقبول لإثبات اردنيتك الا اذا معك شهادة جنسية أو تجنس (ضاحكا) .
الزائرة: بس بالله عن جد، شو الفرق يعني؟
الموظف: يا ستي، اذا قدمتي وثيقة تثبت انك اردنية، تذكرة الدخول بكون سعرها دينار واحد فقط….أما إذا ما معك إثبات انك اردنية، هوية أحوال أو جواز سفر، بعاملك معاملة الأجانب وهاي الها حسبة ثانية.
الزائرة: وشو هالحسبة دخلك؟
الموظف: ياستي،
سعر التذكرة للأردنيين: دينار واحد فقط عن كل شخص شريطة اثبات الجنسية ببطاقة الهوية أو جواز السفر.
سعر التذكرة لغير الأردنيين العرب 10 دنانير، و 90 دينار لزوار اليوم الواحد من المعبر الجنوبي. و 50 دينار لزوار المبيت يوم واحد، و 55 للدخول يومين، و 60 دينار للدخول 3 ايام. عن كل شخص شريطة اثبات الجنسية ببطاقة الهوية أو جواز السفر.
اما سعر التذكرة للمقيمين لمدة سنة واحدة فهي مثل الاردنيين شريطة إثبات مدة الإقامة ببطاقة الإقامة الصادرة له/لها (هاي عشان الجندر).
-و الاطفال اقل من 12 سنة مجاناً.
واذا كنتِ من هواة ركوب الخيل، ف الاردني عليه دفع مبلغ 7 دنانير ذهابا وايجابا. أما الأجنبي مدفوع من التذكرة ركب، أو ما ركب عدم المؤاخذه.
ركوب الجمال من الخزنة الى قصر البنت من 10-15 دينار…. للاردني وغيره ما تفرق.
اما سيارات الكهرباء للأردنيين ذهابا وايابا 15 دينار و 10 دنانير لاتجاه واحد.
لكن للاجانب، ذهابا وايابا 25 دينار و 15 دينار لاتجاه واحد.
اما الحمير والبغال (حاشاكِ من هالطاري) ، ف بتركبيهم لتسلق الإدراج للوصول إلى الدير أو المذبح، وما في فرق بين الاردني أو الأجنبي والسعر انتي وشطارتك.
وهلا يا ستي، فهمتي شو الفرق بين الاردني والأجنبي بالأسعار؟ ، وعرفتِ كيف تثبتي انك اردنية؟ بدون كثر فلسفة، وهوية وطنية وهوية جامعة، وأفلام عدم المؤاخذه؟
*نائب رئيس جمعية السلم المجتمعي
وعضو الهيئة الإدارية لجمعية عون الثقافية الوطنية.
Zuhdi.janbek@gmail.com
